我們不要讓妳成為這個世界最後一個知情的人，於是我選了今晨，當妳正在享用美味的提子小麥包時，我對妳坦白「妳快做家姐了，我有了小BB！」。
一臉茫然「你？而家？」。
「係呀！」。
「喺邊呀？」。
「喺肚裏面！」。
「佢點出黎呀？喺口度出黎？」。
「唔係，喺肚下面出黎！」。
之後，就陸陸續續出現有趣對答：
「妳快做家姐喇！以後妳要幫佢換尿片、餵佢食奶、餵佢食飯、幫佢刷牙！」。
「但係……佢冇牙嫁喎！」。
「咁你餵佢食奶囉！」。
有人靈光一閃「如果佢刷牙攪攪震呢？」。（有人自知自己刷牙經常攪攪震，絕頂煩擾！嘿！嘿！到妳要幫佢刷牙喇！嘿！嘿！）
「妳係家姐嘛，妳要教佢喇！」。
———-
「佢出世時講中文定講英文？」。
「佢出世時唔識講嘢，妳要教佢講！」。
「咁教佢中文定英文定係普通話呀？」。
———-
「我想入去（你個肚度）睇吓佢！」。
———-
「我想入去你個肚度同佢傾吓！」。
———-
（改不了口）「BB」。
「我唔係BB，佢先係BB，我係家姐！」。
———-
印傭S「第日BB出世我就好忙架喇！」。
家姐仔（拍晒心口）「我幫你“湊”佢，你入廚房煮飯啦！」。
———-
家姐知道自己將要升呢，就經常「細佬」「細佬」，雖然解釋無數次可能是細佬又有可能是細妹，但有人仍然高叫「細佬」「細佬」。
「點解妳鍾意細佬？」。
「隔離個哥哥姐姐（龍鳳胎）都係一男一女嘛，我又要一男一女！」。
（我笑）「嗯！」。
———-
「細佬係咪曵啲，細妹係咪乖啲？」。
「嗯……男仔係活潑啲嘅！」。
（有人立即轉軚）「咁我要細妹！」。
