以下事件發生於香港著名旅遊地區的一間連鎖咖啡店內。
剛飽餐一頓的小姐「唔唔！」。
C媽極速手執一袋棉花及尿片另一袋抹手紙及流動C坑，另一隻手拖着小姐往樓下的獨立洗手間。
一切準備就緒，安頓小姐以最佳姿態坐好，小姐突然「除褲褲！」（意思是脫下整條褲）。
我「唔駛啦！」。
小姐邊伸腳邊「哇！除……除！」以表示不滿。
我「好啦好喇！」（據經驗所得，在緊急及趕時間的情況下，如非嚴重事項，最好向唔講道理唔駛俾面你的暴民妥協！）。
C媽一邊哦一邊替小姐除鞋再除褲。突然門外傳來連續數次大力推撞聲（嘭嘭嘭），「嘩！係咪呢度？開唔到，要攞鎖匙架？！」。
十五秒後……門外又傳來（嘭嘭嘭）「有冇人架，咁耐架！」。
三十秒後……
小姐起身「冇！」。
C媽七孔生煙，忙着收拾各樣設備又要捉着只穿著襪子在洗手間地上行行行的小姐。
門外又傳來「嘩！咁耐架！」。
七手八腳捉緊小姐強迫她穿片著褲著鞋。
收拾妥當，誰知小姐一個轉身，雙手已游走垃圾桶上……。
C媽以金雞獨立姿態，讓小姐坐在其厚肉大腿上洗手。
一個世紀後終於完事。開門拖着小姐步出，幸好眾等候者未有發爛只報以不滿眼光！
爸爸D在樓梯口迎接小姐，兩人“笑騎騎”地上樓去，C媽呢？一額是汗拿着一包二袋緊隨其後！
