C小姐14個月時，因為一次誤會，發現原來外出也可以不帶手推車。當然訓練她多行多探索是好事，但如果去的地方不夠新鮮不夠吸引，那就休想小姐她會自己落地行，最慣常的動作是站在前面伸高雙手大聲：「包（抱）！」
那一晚帶同C小姐去超市走一趟，回程時又「包！」。一個24磅11安士的骨肉，再加上我手拿起碼5磅雜物，30磅？！要舉起自己三成體重的物件行十多分鐘？！No way！
商場內……
「包！」
「嘩！妳聽吓，前面琴行有人拉緊小提琴喎，我哋去睇下！」
成功說服只聽過兒歌及莫札特音樂的小姐多行兩步去欣賞琴音！
商場內準備落樓梯去出口……
「包！」
「落樓梯好好玩咕喎，妳試吓吖！」
成功循循善誘小姐自己半行半彈落咗樓梯！
商場出口準備上樓梯……
「包！」
「妳睇又有得上樓梯喇，睇吓妳可以行幾多級！」
又一次成功令小姐向上爬晒幾級樓梯！
紅磚平路……
「包！」
「妳睇前面就係游泳池，我哋去睇人游水！」（媽媽成青蛙狀在空氣中做晒動作扮游水）
再成功引誘養尊處優嘅小姐勞動吓雙腳！
石屎平路……
「包！」
「嘩！前面塊大樹葉俾風吹到會行呀，我哋去睇吓！」
再成功令到充滿好奇心嘅小姐半行半跑追塊樹葉！
準備落斜……
「包！」
「好啦，妳都行咗好遠喇，抱抱啦！」
在“呃呃氹氹”之下已經行了超過一半路程，已是破紀錄之作。
終於，在十幾二十度天氣之下，舉住三十磅骨肉連雜物回到家中的媽媽，背脊濕透。
Archive for 十一月, 2008
用口抱妳半程路
Posted in C媽, C小姐 on 21 十一月 2008 | Leave a Comment »
很喜歡聽C小姐“講嘢”，其實嚴格來說只是發音，一個似是而非的「揸住」、「腳趾」、還有她經常掛在口邊的“bub-pu（ble）”，已令我樂上半天。
我及D從不急着要C小姐說話，D：「佢識講嘢一定成日嘈住要玩BB-Go-Around！」。
近來妳一忟憎就大力抓我，我兩臂佈滿十數度血抓痕。平時我會平心靜氣對妳循循善誘，因為我明白妳未有語言能力，妳唯一可以的是以行動表達自己。
星期日妳又抓我，今次即時皮破血流實在太痛，忍不住對妳大吼之餘，所有感覺湧上心頭，明知妳年幼無知亦未懂對錯，但我還是忍不住大哭，我實在傷心。
爸爸D用了最溫和的懲罰要妳記著自己做錯事。望著妳大喊我很心痛，眼淚又忍不住流下！
D對我說：「睇見妳喊我好心痛！」
我：「我睇見佢喊我仲心痛！」
育兒……有血有淚！
後話：相信在這個地球上有一種生物，無論佢點對待我、點拒絕我、要我傷心、要我為佢流幾多眼淚，我仍然甘心為佢付出，呢種生物就叫仔女！
粟米三文魚蝴蝶粉
Posted in C媽, C房菜 on 19 十一月 2008 | Leave a Comment »
材料：
蝴蝶粉2湯匙
新鮮三文魚（切粒）50g
有機粟米半條
做法：
1. 蒸熟粟米，起肉備用。
2. 蝴蝶粉煮至半軟身，盛起備用。
3. 將4/5粟米粒及七湯匙水放入攪拌機攪勻成粟米汁。
4. 煮熱粟米汁，加入三文魚及餘下1/5的粟米粒，拌勻。
5. 最後加入蝴蝶粉煮至完全軟身即可。
芝士三文魚薯餅
Posted in C媽, C房菜 on 18 十一月 2008 | Leave a Comment »
材料：
三文魚（壓碎）適量
有機薯仔（壓成蓉）半個
有機牛油 半茶匙
嬰兒芝士1粒
做法：
1. 蒸熟三文魚並壓碎；薯仔蒸熟後壓成蓉，盛起備用。
2. 將牛油加入薯蓉內拌勻。
3. 嬰兒芝士切成小粒，加入薯蓉拌勻，並搓成小餅。
4. 放入多士爐內焗10分鐘。
反有機語錄
Posted in C媽, 爸爸D, 食 on 18 十一月 2008 | 1 Comment »
C小姐開始食固體食物時，可以找到可以買到的，我會選擇有機食品。近來她愈來愈對大人飯餸有興趣，我索性連我們自己的食物亦轉為有機。此舉卻惹來非議：
「唓！嗰啲有機食品都唔知係咪真嘅！」
「唓！我日日食一隻蛋食咗幾十年又唔見我死！」
「你親眼睇住隻有機雞生蛋呀？！你點知啲蛋係有機！」
「啲豬係咪天然要問隻豬先知；啲雞係咪有機要問隻雞先知！」
難得D全力支持，對於類似以上的“毫無建設性言論”，我實行借咗聾耳陳對耳。
C小姐的另一款不加糖下午茶點。
焗爐：Delonghi EO2150
（份量：三十二個）
材料：
有機糙米粉 — 1又1/4杯（150g）
泡打粉 — 1/8茶匙
梳打粉 — 1/8茶匙
有機啤梨蓉 — 110g
有機提子乾 — 15g
橙皮粒 — 適量
有機大雞蛋（打散） — 1隻
葡萄籽油 — 1湯匙
做法：
1. 篩勻糙米粉 、泡打粉及梳打粉於大碗中，加入提子乾及橙皮粒拌勻成乾材料。
2. 拌勻啤梨蓉、雞蛋及葡萄籽油，再倒入乾材料的大碗中。
3. 拌勻所有材料成粉團，分成小餅。
4. 在已預熱180ºC的焗爐焗15分鐘。
製成品：這個曲奇不是硬脆的那種，反而有少少韌度。因為糙米粉麵團沒有筋性，所以難以用cookie cutter去造型，唯有隨意搓成小餅形狀。
開始替C小姐下午三時那餐奶轉固體食物，除了正餐外，又要再絞盡腦汁設計餐單。今次我參考其他嬰兒食譜製作了這個不加糖鬆餅作為她的下午茶點。
焗爐：Delonghi EO2150
（份量：三十個）
材料：
有機中筋麵粉 — 1杯（120g）
有機燕麥片（碎） — 40g
泡打粉 — 1茶匙
梳打粉 — 1/4茶匙
鹽 — 1/8茶匙
自家製乳酪 — 100g
有機啤梨蓉 — 100g
有機啤梨（切粒） — 140g
有機提子乾 — 30g
有機大雞蛋（打散） — 1隻
做法：
1. 篩勻中筋麵粉 、泡打粉、梳打粉及鹽於大碗中，加入提子乾及燕麥片碎拌勻成乾材料。
2. 拌勻乳酪、啤梨蓉、啤梨粒及雞蛋，再倒入乾材料的大碗中。
3. 輕手拌勻所有材料，切勿大力及攪拌過度，否則鬆餅不會鬆軟。
4. 將拌好的材料倒入小鬆餅紙杯內。
5. 在已預熱180ºC的焗爐焗20分鐘。鬆餅焗好後可繼續讓其在焗盤內多10分鐘，蒸氣會令鬆餅更鬆軟。
製成品：像我這般嘗盡甜酸苦辣的俗世人來說，這個鬆餅的確略為淡口，但勝在有提子乾及啤梨粒的小甜味，儘管沒有加糖，C小姐尚算喜歡。我刻意造成小餅狀，讓C小姐可以方便用手整個拿起，亦可當成finger food。
貼紙
Posted in C媽, C小姐, 玩 on 17 十一月 2008 | Leave a Comment »
我家的生果，只要被發現有產品標貼在上，不消數分鐘就會被撕去。生果有時還會留下深淺不一的指甲刮痕，是橙是香蕉還好，如果是蘋果啤梨就要即晚吃掉。之後，失驚無神又會在家中牆壁、玩具甚至C媽的膝蓋上發現該批產品標貼。
謀殺
Posted in C媽, C小姐, 教 on 14 十一月 2008 | Leave a Comment »
某人訓示C小姐（及其包拗頸媽媽）：
「喂！條褲放喺單車個箱仔度架嘛！」（咁條褲可唔可以釣喺軚盤度？點解一定要咁整齊放喺個箱仔度？！）
「盒積木唔好放喺座位度，要放喺個箱仔度架嘛！」（點解我唔可以放喺座位度？我唔坐我推架單車得唔得？！）
「邊有人倒轉坐單車架？！要調翻轉！」（點解我唔可以倒轉坐？架車行得咪得囉！）
「個太陽要用紅色筆畫！」（點解太陽一定係紅色？）
唔該，我想報警，有人謀殺我個女啲創意！！！！！
一如港股，星期六、日及公眾假期休市！
CC細語: 送媽媽搭巴士！
備忘錄:
格言:
文章彙整
-
新鮮滾熱辣
分門別類
-
最近的回應
C媽 on 無麩質糙米麵包（Gluten-Free Brown Rice… C媽 on 無麩質糙米麵包（Gluten-Free Brown Rice… siugub on 無麩質糙米麵包（Gluten-Free Brown Rice… C媽 on 黑粿麥提子乾合桃麵包（堅實版） cathy mama on 黑粿麥提子乾合桃麵包（堅實版） 簡介
Meta
