母親的寄望

繼前陣子身邊每人見到我都會說：「妳瘦咗好多喎！」之後，近排眾人的〝潮語〞是「妳幫個女搵咗幼稚園未呀？！」。名校維多利亞幼稚園一所分校，已經有400個2007年出世的幼童遞了申請表，頗為誇張。
 
以下是節錄自各位〝有心人〞的言論：
 
某人A：「小朋友係一張白紙，你可以寫好多嘢落去！」
某人B：「人人初中就開始谷個仔女，我好後悔而家先谷佢！」
某人C：「你要小心選幼稚園，幼稚園好緊要，係一個根基！」
某人D：「你最緊要俾個女學長笛，長笛少人學，入學有着數！」
某人E：「細路仔唔可以唔谷佢讀書，肯自發性嘅真係萬中無一！」
 
 
我堅持~~
1.  妳一定要學游水因為是求生技能，但不能為了入學為了學分而去操水
 
2.  妳可以去學長笛學捉棋學東學西，但一定要有興趣，不能為了攞獎為了入學為了學分為了別人
 
3.  妳可以去參加各項比賽，但一定要本著去學習去見識去爭取經驗的精神，不能為了攞獎為了砌靚個profile
 
 
我討厭~~
1.  學琴已經是指定動作，小朋友還要被迫「相勸」學多一種樂器
 
2.  要參加各式各樣的課外活動，務求星期一至日冇時得閒
 
3.  時時刻刻都要去補習班，連發白日夢的權利、時間也被剝削
 
4.  家長訴說自己的仔女考試測驗攞八十幾分咁低分，應該攞九十幾分先叫滿意
 
5.  大家參與惡性競爭，冇獎牌冇課外活動就等於冇好學校收
 
其實我從不奢望妳長大後會有甚麼大作為、甚麼出人頭地、甚麼住洋樓養番狗（不過有梗係好啦！)，我只想妳可以跟我一樣，找到幸福、找到一個很合拍、很愛妳、可以互相扶持的肥仔伴侶。點解要係肥仔？因為感覺上肥仔會錫老婆多啲嘛！
 
 
註：有心人一詞絕無揶揄之意，她(他)們確是有心人，只是某程度上與我及D的觀點角度有所不同而已！

Read Full Post »