You Drive Me Wild

同事K很有心，久不久會送些小禮物給C小姐，有吃的、有穿的、有擺設的、有日常用的。最近是這個相架。
 
 
 
 
對！ 繼上次「Nice to meet you！」事件後，我又可以再高呼:「You drive me wild！」
 

Read Full Post »

一份子

D:「C小姐大啲好唔好唔要架車呢?」
「佢而家有車載出載入咁舒服，咁你自己問吓佢先啦!」
D:「做乜要問佢呀?! 又唔係佢出錢!」
「咁佢係家庭一份子吖嘛!」
D:「恐怖佢就係一份子!」

Read Full Post »

一個孩子十個恐嚇

在街上不難聽到父母恐嚇教導自己的子女，或者你我都曾經是受害者甚至是行兇者
 
「你唔乖會有拐子佬捉左你去!」
「你唔聽話就話俾校長聽!」
「你唔瞓就有鴉烏婆嚟搵你!」
「你唔著衫冷到就捉你去醫生度打針!」
「你食埋個橙粒核第時個肚會生橙樹!」
我覺得最經典的是從電台聽回來的這個——一個男聽眾致電電台講述他的童年陰影，他問他的媽媽:「點解男仔有果度， 女仔冇?」他媽媽:「係呀!  啲女仔跑得快跌左吖嘛! 你以後唔好跑咁快喇!」
 
甚至我們的古今寓言故事，最後一頁總要加一個恐嚇教訓。
 
經常提醒自己要用更好的方式去引導C小姐，需要的是無限的耐性再加愛心再加耐性又再加愛心。
 

Read Full Post »

帽

自小很喜歡買帽，C小姐現在已擁有五頂帽，平均兩個多月便買一頂。雖然明知一替她戴上她就扯下，但每次看見都忍不住要買。
 
1號青春少艾型
2號寒冷警告型
3號聖誕快樂型
4號純潔無瘕型
5號越野行山型

 

Read Full Post »

窩心對話

 辛勞一天回到家……
「有冇掛住我呀?」
「吖…吖…吖… dada…da…!」
 
「咁即係有定冇呀? 有呀?」
「吖…吖…吖… dada…da…!」
 
「吓?! 冇呀?」
「吖…吖…吖… dada…da…!」
 
「吓?! 咁就當有啦! 錫錫!」
 

Read Full Post »

C情畫意

C小姐大作一幅。

 
 
不要小看小朋友的創作力，聽聞她(他)們可以告訴你她(他)們畫了什麼，甚至每一筆每一個圈也可以被串起成為一個故事。兩位博士Dr. Kathy Hirsh-Pasek 及 Dr. Roberta Golinkoff 甚至出書為小朋友的大作解話。
 

 
正等待C小姐說出她的故事。
 
 

順便一提 Dr. Kathy Hirsh-Pasek 及 Dr. Roberta Golinkoff 是 Einstein Never Used Flash Cards: How Our Children Really Learn– And Why They Need to Play More and Memorize Less 這書的作者。這書曾得到 Books for a Better Life Award。香港教育學院亦曾在一個教育講座上推介過此書。
 

Read Full Post »

滿月酒的特備節目

中國人最愛熱鬧，凡有喜慶事總要在酒樓喧鬧一番。D和我避得開結婚酒也躲不過要擺C小姐的滿月酒。
 
試問一個剛出世一個月的嬰兒怎能抵受酒樓的喧嘩嘈吵、麻雀耍樂及一眾三姑六婆的七嘴八舌?  於是C小姐只好以喊來抗議，她媽媽為了平靜她的情緒只好抱着她，如是者就惹來更多非議。
 
「嘩! 抱慣晒啦!」— 係呀! 又唔駛你抱，咁睇唔過眼做乜啫!

「佢一喊你就抱咪縱慣晒!」— 係呀! 慈母多乖女呀，未聽過咩!

「你有得佢喊啦! 你忍手兩日唔抱佢，等佢喊兩日就唔喊嫁啦!」— 哦! 原來要佢喊到死喊到啞喊到絕望收聲大家先高興!

「我個女果時喊，我擺佢入厠所有得佢喊飽佢!」— 你個女真係慘囉!
 
一眾婦人為表現自己對「湊仔湊女」幾咁經驗豐富、幾咁了得、幾咁巴閉，於是就輪流抱起C小姐表演一番。C小姐雖然年紀小小但已深明要識時務這個道理，於是不再喊了，終於回到媽媽懷抱。
 
C媽說過如果再有D小姐、D先生、E小姐、E先生，決不會再擺滿月酒，決不會再貢獻她他她他出來娛賓!!!!!
 

 

Read Full Post »

香蕉 vs 牛奶蕉

C小姐很喜歡吃香蕉，以前我會邊切一片片邊餵她，但她嫌我動作慢，會發出怪叫警告我要快，好了，索性整條給她自己咬。
 
D搖頭:「人類果然係馬騮進化!」
 
…
 
中國人著重養生，亦聽過不少食乜乜會燥熱、食乜乜又會寒涼，又有人話BB唔可以日日食香蕉因為寒涼，要食就食牛奶蕉。但原來牛奶蕉不是經常有貨，終於找遍中環大小生菓檔，買了。
 
「我買咗牛奶蕉俾C小姐!」
D:「咁係咪高鈣低脂呀?!」
  

 

Read Full Post »

掃風

爸爸D以前偶爾會替C小姐掃風，每次總會唸唸有詞:
 
「爸爸掃風風，一定唔會窮到燶，第日一定嫁個靚老公!」
 

Read Full Post »

失心症

十多年前看過「心靈雞湯 : 關於女人」一書，很喜歡當中的一段 – 「下決定生小孩可是關係重大。這是在決定讓你的心永遠在你的體外走動。」。當時是喜歡，今日是共鳴。
 

二十分鐘沐浴時間，會有二十分鐘想著為何剛才C小姐會發脾氣。

一個鐘頭食午飯時間，會有一個鐘頭趕着要為C小姐買東買西。

和D拍拖看電影，會有十分鐘時間靈魂出竅。

一日八個鐘頭工作，會有數個鐘頭一邊做報告，一邊想著回家陪C小姐玩耍。

曾經試過十多次發夢C小姐睡在我旁快要跌下床，於是伸手去捉著她，結果D慘被弄醒十多次。  

 

Read Full Post »